獲得的稱讚

好開心，今次覆診醫生讚我修為高咗。

我知道我只係用另一種方法去遮掩，問題始終未解決，但係能夠諗到同實行新方法，又可以令自己減少受滋擾程度，亦都真係算進步咗。

工作上一直背負太多太重唔係自己嘅責任，最近上級安排將唔應該由我長期孭飛嘅責任同工作流程放返出去。新安排下工作量冇特別少咗好多，但至少責任壓力大大減輕。

厭惡嘅同事我承認繼續厭惡，唔同嘅係我會做自己嘢去遮掩其滋擾，例如全日戴住耳機播音樂抵擋噪音、畫畫，令自己受壓時有疏通出口，亦可以盡快進入心流狀態工作。

其實我好喜歡寧靜環境（俗稱“烏蠅飛過都聽到”），但既然呢啲咁嘅人滋擾他人都唔覺得自己有問題，咁我因為聽住音樂聽唔到電話或有啲咩甩漏我絕對有guts講係因為呢個人囉，我真係唔想因為被滋擾而影響情緒影響工作效率喎。

我就唔怕因為咁畀人掟走，都已經去到被滋擾到想自傷，所以我決定照顧好自己，顧好工作效率（等同個人品牌）為優先。

個人方面，今次仍然冇勇氣同醫生講……我發覺將自己想獲得父母注意、獨立關愛嘅渴望轉移咗去醫生度，亦都出現依賴佢嘅情況。但因為咁，我終於由經常講唔係想責怪父母，唔願意承認有幾憎佢哋、有幾憎恨原生家庭，到而家開始願意承認、接納。

愛嘅反面就係恨，有幾憎恨就代表有幾多渴求。承認及接納渴求，先會願意尋找處理方向而唔係繼續強壓。

好擔心講出嚟會被掟去其他醫生follow冇得再見佢，兼且要重新適應治療師同環境，被遺棄嘅恐懼感又出現，但我仍然決定最終會將呢幾個月嘅感受同擔憂講出嚟。坦白係我嘅個性，所以對自己內在坦白更加重要，亦係自療嘅一部分。

另外，因為之前有過提前覆診打亂咗開藥份量，所以帶晒剩餘藥物兼且遞上剩餘數量、大約幾多日份量嘅筆記。結果好開心，醫生讚我幫醫管局慳返啲藥，亦都因為信任而有睇住份筆記計算開藥。其實對病人嚟講亦有好處，一嚟無必要囤積藥物令自己混亂，二嚟多出嘅藥物放到過期亦係一種浪費。估唔到獲得稱讚，好開心呢。